Arrincan as obras na rotonda da Torre na Coruña para renovar o firme e crear arredor de 30 prazas de aparcamento
O Concello iniciou esta semana as actuacións de mellora na contorna da rotonda da Torre, un punto clave do paseo marítimo no que se actuará para optimizar a mobilidade e a circulación. O plan contempla a renovación integral do firme da calzada, deteriorado polo uso e a exposición ás inclemencias do tempo, e a eliminación dos raís do tranvía actualmente en desuso, seguindo a liña aplicada noutros treitos para incrementar a seguridade viaria. Unha vez rematado o novo pavimento, acometeranse os traballos de pintado e sinalización horizontal, co obxectivo de ordenar a circulación e reforzar a lectura dos itinerarios.
Ademais, habilitaranse novos espazos de estacionamento en batería nun dos laterais da rotonda, aproveitando a franxa que ocupaban os raís: calculan gañar arredor de 30 prazas. Para iso estase a demoler un pequeno illote peonil que funcionaba como plataforma nos anos de servizo do tranvía, e os labores de picado xa están en marcha. A concelleira de Infraestruturas e Mobilidade, Noemí Díaz, subliña que a nova bolsa de aparcamento contribuirá a aliviar a presión que se produce en fins de semana na contorna da Cidade Deportiva pola afluencia ás xornadas de fútbol.
En paralelo, lembrou que a estratexia municipal prioriza o transporte público e compartido: o Concello está a recoller achegas cidadás para definir os pregos do vindeiro contrato do bus urbano e analizar demandas como os desprazamentos á Cidade Deportiva da Torre, nos días e franxas de maior concorrencia. Trátase, en definitiva, dunha actuación cirúrxica dentro dun plan progresivo de adecuacións ao longo do paseo marítimo, feito por fases e adaptado ás necesidades específicas de cada tramo.