Arrinca na Coruña a XXI edición do Concurso de Tapas Picadillo con 25 propostas ata o 28 de decembro
A Coruña deu inicio este 18 de decembro á XXI edición do Concurso de Tapas Picadillo, unha cita xa consolidada no calendario gastronómico galego e considerada a máis antiga destas características en Galicia. O obxectivo, segundo explicou o Concello, é dinamizar a hostalería e promocionar a oferta turística culinaria da cidade, poñendo o foco na creatividade dos cociñeiros, nos produtos galegos e de quilómetro 0 e no apoio ao sector, especialmente nun período de alta afluencia como o Nadal.
O concelleiro de Cultura e Turismo, Gonzalo Castro, presentou nun acto na cervexería Malte Galera os 22 locais participantes e as 25 elaboracións que se poderán probar ata o 28 de decembro. O concurso estrutúrase en dúas categorías: 12 tapas na modalidade de 'Tapa Receitario Picadillo' e outras 13 na de 'Tapa Creativa'. As propostas están inspiradas na obra 'A cociña práctica', o manual co que Picadillo contribuíu a divulgar a cociña tradicional galega e os menús destas datas.
A organización difundirá folletos con tres rutas de tapas para favorecer tamén percorridos pola cidade durante estes dez días. Ademais, cada establecemento contará cun cartel coas fotografías das tapas e un código QR con información detallada sobre ingredientes e técnicas de elaboración. O prezo de degustación sitúase entre os 3 e os 5 euros.
O certame contará con xurado profesional en dúas fases: unha primeira rolda na que catro xuíces seleccionarán as tapas finalistas e unha fase definitiva a cargo dun novo xurado de cinco expertos gastronómicos, no que participará Chau Fernández-Gago Puga, neta de Picadillo. Tamén haberá premio do público, cun sistema de votación a través de QR nos locais, e as persoas que participen entrarán nun sorteo de distintos agasallos, cuxos resultados se publicarán na web do concurso, onde tamén se poden consultar as tapas, horarios e opcións veganas.