Eventos

A Asociación Cultural Triskell convoca unha xuntanza con entrada libre no Centro Multiusos a partir das 20.00 horas, con actuacións do alumnado, petiscos e ambiente festivo para despedir o ano en comunidade

O Centro Multiusos de Armentón, en Arteixo, converterase este sábado, 27 de decembro, nun punto de encontro para despedir o ano cunha proposta centrada na música. A Asociación Cultural Triskell organiza unha 'festa de despedida de ano' de acceso libre e gratuíto, aberta a veciñanza e visitantes que queiran sumarse a unha noite pensada para compartir mesa, cantos e baile.

A cita arrincará ás 20.00 horas e inclúe un programa co que a entidade busca mesturar a parte festiva coa súa vertente formativa. A proposta anuncia actuacións musicais do alumnado, ademais de petiscos e unha foliada aberta. Un formato no que calquera pode participar con instrumentos, voz ou baile.

Dende Triskell salientan o carácter familiar da xornada e animan a achegarse 'coa familia triskeliana' para gozar de comida, bebida e música nun ambiente de encontro, nunha época na que moitas asociacións culturais aproveitan para reforzar lazos e manter viva a tradición.

A organización corre a cargo dunha entidade asentada en Armentón e orientada á cultura tradicional galega, con actividades musicais e culturais abertas a distintas idades ao longo do ano. O evento celebrarase no Centro Multiusos da parroquia, punto habitual de actividade social e cultural da asociación.