Infraestructuras | Sanidade

O Concello de Culleredo limita a 40 minutos, de balde, unha vintena longa de prazas xunto ao centro de saúde e Rioboo pide á Xunta que habilite unha parcela en desuso para gañar capacidade

Atopar sitio para deixar o coche cando toca consulta médica non sempre é doado no Portádego. Para favorecer a rotación e priorizar os usuarios do centro de saúde, o Concello de Culleredo puxo en marcha unha nova zona de estacionamento limitado no aparcadoiro público da contorna, sinalizada como zona azul pero de carácter gratuíto.

Segundo explicou o alcalde, José Ramón Rioboo, a medida pretende 'garantir a existencia de aparcamento para quen vai ao médico'. O rexedor lembra que a Xunta de Galicia construíu o centro de saúde no ano 2017 sen espazos de estacionamento e que o Concello destinou daquela unha finca municipal para cubrir esa carencia. Agora, engade, 'damos un paso máis para favorecer especialmente aos pacientes'.

A actuación materializouse esta semana co repintado das prazas afectadas, unhas 24, e coa instalación de nova sinalización vertical. O tempo máximo autorizado será de 40 minutos e a limitación aplicará de luns a venres entre as 8.00 e as 15.00 horas, coincidindo co horario de maior actividade do centro.

Para o control do tempo, os condutores deberán indicar no interior do vehículo a hora de chegada. A Policía Local anunciou vixilancia e comprobacións para evitar ocupacións prolongadas, un comportamento que, segundo o Concello, se detectou recentemente e que reduce a dispoñibilidade para as persoas que acoden a consulta.

O goberno local tamén mira máis alá desta regulación. Rioboo instou á Xunta a habilitar como aparcadoiro a parte da parcela que o Concello lle cedeu no seu día para construír o centro de saúde e que quedou en desuso. A creación de prazas nese punto permitiría, segundo o alcalde, reservar espazo para o persoal e aliviar a presión sobre o aparcadoiro público.

O rexedor afirma que o Concello mantén 'total disposición' a facilitar máis superficie se é necesario e mesmo se amosa disposto a ceder terreo da parcela da radio municipal para incrementar as prazas. A súa petición á Consellería baséase, di, nunha 'necesidade indiscutible' da veciñanza.