Amigos da Ópera presenta alegacións ao proxecto Coruña Marítima para reforzar a infraestrutura cultural
A Asociación de Amigos da Ópera da Coruña (AAOC) vén de presentar as súas alegacións ao proxecto Coruña Marítima, incidindo na necesidade de mellorar as infraestruturas culturais da cidade para garantir espectáculos de calidade e consolidar A Coruña como referente cultural.
A entidade, decana no ámbito operístico en España, trasladou as súas preocupacións sobre as actuais limitacións e deficiencias dos espazos dispoñibles, que dificultan a celebración de eventos de gran formato, como ópera, recitais, zarzuela ou danza. Neste sentido, Amigos da Ópera defende a creación de novos equipamentos modernos e adaptados ás necesidades deste tipo de espectáculos.
A AAOC presentou alegacións nos epígrafes referidos á identificación de equipamentos culturais a nivel de cidade, a construción de novas instalacións ou a creación dun espazo multiusos cuberto de gran capacidade en San Diego. A asociación insiste na urxencia de dar resposta ás carencias actuais, que limitan a oferta cultural estable e de calidade.
No documento remitido á Comisión de Coruña Marítima, a Asociación de Amigos da Ópera recoñece que A Coruña conta con espazos capaces de acoller espectáculos de diversa índole, así como con empresas especializadas en eventos de alto nivel artístico e tecnolóxico. Con todo, sinalan que os elevados custos asociados a estas infraestruturas fan inviable o seu uso regular para proxectos como a Tempada Lírica, que require espazos estables e axeitadamente equipados.
A asociación destaca as dificultades que enfronta a ópera na cidade debido ás limitacións dos escenarios dispoñibles: Teatros municipais, escenarios de tamaño reducido, falta de espazos complementarios e unha programación intensa que deixa poucas datas libres para outros eventos; e palacio da Ópera, deterioro das instalacións escénicas, que precisan de fortes investimentos non previstos; taxas elevadas (125.000 euros por cada ópera representada), escaseza de datas dispoñibles debido á alta ocupación da OSG e outras actividades. Ademais, cada ópera en versión escénica require entre 3 e 4 semanas de uso exclusivo do espazo.
Todas estas alegacións teñen como obxectivo que a Comisión Coruña Marítima, conformada polo Concello da Coruña, a Xunta de Galicia, o Ministerio de Transportes e Mobilidade Sustible, Portos do Estado e a Autoridade Portuaria, integre a arte e a cultura nas bases estratéxicas do proxecto, asegurando un futuro sólido para as artes escénicas na cidade.