Alvedro activará un reforzo especial de taxis durante o peche de Lavacolla
O servizo de taxi no aeroporto de Alvedro contará cun dispositivo especial durante o peche temporal de Lavacolla. Culleredo, A Coruña e a Xunta acordaron este martes ampliar de forma extraordinaria a prestación no aeródromo para responder ao incremento de pasaxeiros que se prevé entre o 23 de abril e o 27 de maio, período no que o aeroporto compostelán deixará de operar.
A principal medida pactada pasa por permitir que durante ese tempo poidan traballar en Alvedro todas as licenzas domiciliadas nos concellos de Culleredo e da Coruña. O obxectivo é gañar capacidade de resposta ante unha demanda que se prevé superior á habitual e que, ademais, pode implicar servizos máis longos e unha maior rotación de vehículos.
No encontro tamén quedou fixado que os taxistas de Culleredo conservarán a preferencia na cabeceira da parada do aeroporto, tal e como recolle o convenio en vigor. Ese foi un dos puntos defendidos polo alcalde cullerdense, José Ramón Rioboo, que participou na reunión xunto ao concelleiro da Coruña José Manuel Lage e á directora xeral de Mobilidade, Judit Fontela, ademais de representantes das asociacións do sector.
O acordo non se limita á situación excepcional das próximas semanas. Unha vez reabra Lavacolla, A Coruña poderá autorregular coas súas asociacións o funcionamento da bolsa de taxis prevista no convenio, coa intención de mellorar a cobertura do servizo e axustar con máis eficacia a resposta aos momentos de maior demanda en Alvedro.
A reunión serviu tamén para reabrir un debate de maior alcance. Sobre a mesa quedou a posibilidade de crear unha área de prestación conxunta na área metropolitana da Coruña. Rioboo amosouse favorable a estudar esa fórmula, aínda que reclamou antes un informe técnico e socioeconómico exhaustivo que defina que concellos deberían integrarse, que impacto tería para o sector e que melloras reais achegaría á cidadanía.