Alternativa dos Veciños reclama solucións urxentes para garantir o futuro da Escola de Música Sementeira
Alternativa dos Veciños de Cambre traslada que a Escola de Música Sementeira, con máis de 40 anos de traxectoria, atópase en perigo de desaparición debido á falta de pagamento dos convenios municipais que financian a maior parte da súa actividade. A formación considera “inadmisible” esta situación que ameaza a continuidade dun centro emblemático para a formación musical e a convivencia local.
Segundo sinalan desde o grupo, a paralización dos fondos afecta directamente a 14 profesionais e a máis de 200 alumnos e alumnas. “A situación que atravesa Sementeira, coa principal partida económica bloqueada e os seus traballadores e alumnado nunha incerteza inxusta, é unha consecuencia máis da parálise e da confrontación política no Concello”, afirman.
Alternativa dos Veciños reclama ao Goberno local que regularice con urxencia esta cuestión, lembrando que Cambre dispón de recursos suficientes para atender as necesidades reais da veciñanza e non debe deixar que as políticas partidistas perxudiquen os servizos culturais, educativos e deportivos.
“Temos a man tendida para colaborar e acordar as medidas necesarias e esiximos que todos os grupos políticos se senten a resolver esta situación”, manifestan desde a formación. Recalcan, ademais, que “Sementeira non pode pechar; garantir a súa continuidade é unha obriga institucional e un compromiso con toda a veciñanza”.