Alternativa dos Veciños pide prazos para reabrir o Parque Ramón Barba tras meses de obras paradas
Alternativa dos Veciños denunciou no pleno municipal de Cambre a situación do Parque Ramón Barba, onde as actuacións levan meses paralizadas, segundo expuxo a formación. O grupo asegurou que esta circunstancia mantén o malestar na zona, xa que a veciñanza continúa sen poder facer uso do parque e demanda coñecer que está a ocorrer e cando se ofrecerá unha solución.
Durante a sesión, Alternativa reclamou explicacións ‘claras’ sobre o estado actual das obras e pediu un calendario con datas que permita saber cando poderá volver estar operativo o espazo público. A formación lembrou ademais que xa cuestionara no seu día o enfoque da actuación ao considerar que non respondía á demanda real do Temple e que o investimento (473.000 euros) podería terse orientado, ao seu xuízo, a outras necesidades máis prioritarias.
Segundo indicou o grupo municipal, o Goberno local limitouse a sinalar no pleno que a continuidade dos traballos depende de informes técnicos e de axustes coa empresa concesionaria, sen achegar prazos nin medidas concretas. Para Alternativa, esta falta de definición incrementa a incerteza e o descontento entre as persoas afectadas.