Alternativa dos Veciños pide a Fomento melloras nas vías de servizo do cruce de Ferrol en Bergondo
Alternativa dos Veciños trasladou ao Ministerio de Fomento a súa preocupación pola situación das vías de servizo da nova glorieta no cruce de Ferrol. A formación indica que, pese ás actuacións realizadas ata o momento, persisten problemas de seguridade que afectan tanto a residentes como a condutores que circulan pola zona.
Segundo explican, a vía en pendente en dirección a Betanzos é empregada con frecuencia como atallo para evitar a rotonda, producíndose circulacións a velocidades superiores ás permitidas e manobras que poden xerar risco.
Nos últimos días, Fomento implantou un sistema de sinalización horizontal coñecido como “dentes de dragón” para favorecer a redución da velocidade. Con todo, Alternativa dos Veciños considera que esta medida resulta insuficiente e solicita que se analicen outras opcións que garantan unha maior seguridade.
A formación reitera a súa disposición a colaborar coas administracións competentes para buscar unha solución eficaz que permita mellorar a convivencia do tráfico no cruce de Ferrol.