Alfaroleiros volverá converter Santa Cruz nun epicentro da olería e da música do 6 ao 10 de agosto
A feira Alfaroleiros celebrará este verán a súa 31ª edición, cun programa que mestura tradición artesá e propostas musicais de primeiro nivel. O parque Luís Seoane, en Santa Cruz (Oleiros), acollerá entre os días 6 e 10 de agosto unha nova edición desta cita que cada ano reúne oleiros e oleiras de toda a Península.
A programación musical terá como principais reclamos os concertos de Carlangas, que actuará o venres 8 de agosto, e A Banda da Loba, prevista para o sábado 9. Ambos os concertos celebraranse na praza Esther Pita ás 22:00 horas. A oferta musical completarase co concerto de Catuxa Salom. Live Band Trio, que inaugurará a parte artística o martes 6 ás 21.00 horas no propio parque Luís Seoane, e co espectáculo multidisciplinar "Na Cerna do Son", unha combinación de danza, música e poesía que terá lugar o mércores 7 ás 21:30 horas.
Durante os cinco días da feira, Santa Cruz volverá ser un escaparate da olería tradicional, coa presenza de destacados artesáns que exhibirán e venderán as súas pezas. O evento incluirá tamén actividades de lecer e espectáculos para todos os públicos, consolidándose como unha das citas culturais máis importantes do verán na comarca. O Concello de Oleiros, organizador da feira xunto aos profesionais da olería, destaca o carácter participativo e familiar dun evento que cada ano atrae centos de visitantes.