Medio ambiente

Augas de Galicia mantén o aviso 'vermello' e o Plan Inungal continúa en preemerxencia, cun chamamento á prudencia nas zonas máis próximas ao río

A estación Mandeo-Coirós continúa baixo aviso 'vermello' por risco de crecida, segundo a última información difundida polo 112 Galicia, que mantén activo o Plan Especial ante o Risco de Inundacións en Galicia (Inungal) en fase de preemerxencia.

O aviso implica niveis elevados e posibilidade de desbordamentos nas marxes, polo que as recomendacións pasan por extremar a cautela, evitar achegarse ao cauce e non atravesar zonas anegadas nin pasos inferiores con acumulación de auga, especialmente nos puntos máis sensibles. Tamén se advertiu de que a situación pode ter impacto tanto en tramos urbanos como en núcleos próximos ao río, como Chelo, dependendo da evolución do caudal.

O episodio chega poucos días despois das inundacións rexistradas en Betanzos, cando o Mendo e o Mandeo se desbordaron de madrugada e obrigaron a activar un dispositivo de vixilancia en varias zonas da cidade.