Alerta laranxa por crecidas no Mendo e chamada a extremar a precaución
A Dirección Xeral de Emerxencias e Interior emitiu unha alerta por avenidas despois de que a Rede de Aforos de Augas de Galicia situase a estación Mendo en nivel laranxa, un escenario que implica risco elevado polo incremento do caudal e a posibilidade de crecidas nas zonas máis próximas ao leito do río.
A situación enmárcase na fase de preemerxencia do Plan Especial ante o Risco de Inundacións en Galicia (Inungal), un dispositivo centrado na vixilancia e na alerta temperá para anticipar repuntes e coordinar a resposta dos servizos de emerxencia se fose necesario.
No entorno de Betanzos, onde o Mendo xa protagonizou episodios recentes de desbordamento durante o último tramo de temporais, a elevación do nivel obriga a manter a prudencia, especialmente en pasos, camiños e áreas baixas próximas ao río.
Desde os servizos de emerxencias e protección civil insístese en evitar achegarse ás marxes, non cruzar zonas anegadas e limitar os desprazamentos por áreas inundables, ademais de seguir a información actualizada polos canles oficiais e avisar ao 112 ante calquera incidencia.