Alarma veciñal pola insalubridade en casas abandonadas en Infesta
En Infesta multiplícanse as casas abandonadas que se converteron en acubillo de ratas, tanto no interior das vivendas como nas fincas sen limpar que as rodean. Varias persoas dirixíronse á Plataforma veciñal para amosar a súa preocupación e algunhas aseguraron ter visto roedores 'tan grandes como gatos'. A situación, afirman, xa afecta á salubridade do contorno.
As denuncias céntranse tamén na ausencia de resposta municipal fronte a un problema que consideran de saúde pública. As reclamacións inclúen actuacións urxentes de control de pragas, limpeza e roza das parcelas e requirimentos formais aos propietarios para garantir un mantemento mínimo dos inmobles en ruína e dos terreos anexos.
A Plataforma advirte de que este escenario evidencia o abandono do rural en Betanzos en múltiples frontes e demanda unha folla de ruta con prazos: identificación dos inmobles en peor estado, notificación aos titulares, execución subsidiaria en caso de incumprimento e seguimento periódico nas áreas con maior incidencia. A veciñanza asegura que manterá a presión social ata ver medidas concretas sobre o terreo e resultados visibles.