Aitana actuará na Coruña o 22 de xullo dentro do ‘Cuarto Azul World Tour’
Aitana incluirá A Coruña no seu ‘Cuarto Azul World Tour’. Actuará o 22 de xullo de 2026 e será a única parada en Galicia anunciada por agora. A xira, que percorrerá Latinoamérica, Europa e Norteamérica, marca o comezo dunha nova etapa artística vinculada ao seu próximo proxecto ‘Cuarto Azul’ tras o éxito de ‘Alpha’.
O tour abrirá o seu tramo internacional na primavera, con primeiras datas xa avanzadas para grandes recintos españois e prazas de Latinoamérica, nun formato de produción de gran escala. Entre as cidades españolas sinaladas figuran, ademais da Coruña, sedes como Barcelona, Madrid, Bilbao, Sevilla ou Valencia, dentro dun itinerario que combinará estadios e pavillóns.
En entradas, haberá preventa a través de Santander SMusic do 20 ao 22 de outubro: prioridade para titulares da Tarxeta Aitana o día 20 ás 10.00, e acceso para o resto da clientela de Santander ese mesmo día ás 12.00. A venda xeral abrirase o 23 de outubro ás 12.00 para todo o público.
Con este anuncio, Aitana reforza a súa proxección internacional e prepara o reencontro co público galego no verán de 2026, cun repertorio que combinará estreas de ‘Cuarto Azul’ e os éxitos que a teñen situado como unha das figuras centrais do pop español actual.