AEOPAS reúnese en Arteixo para avanzar na dixitalización do ciclo da auga no municipio
Representantes de AEOPAS (Asociación Española de Operadores Públicos de Abastecemento e Saneamento) mantiveron en Arteixo un encontro de traballo centrado na dixitalización da auga no municipio, unha liña que busca mellorar o control e a eficiencia na xestión do abastecemento e o saneamento.
A reunión enmárcase na relación de Arteixo con AEOPAS, da que a empresa pública municipal SUMARTE é membro desde 2023. Daquela, o Concello formalizou a incorporación da entidade ao colectivo estatal, subliñando a aposta pola xestión pública do servizo.
Pola súa banda, AEOPAS defende un modelo de xestión pública da auga con criterios de eficacia, sustentabilidade e responsabilidade social, e promove tamén a transparencia e a rendición de contas dos operadores públicos.
Nos últimos anos, Arteixo vén impulsando proxectos orientados á modernización do sistema municipal, con iniciativas vinculadas á transformación dixital da rede para dispor de datos máis precisos e actuar con maior rapidez ante incidencias, fugas ou consumos anómalos.