AENA iniciará obras de illamento acústico en vivendas afectadas pola servidume de Alvedro en Oleiros

Tras as alegacións do Concello, os fogares, principalmente de Montrove,recibirán visitas técnicas para medir e definir actuacións gratuítas

AENA acometerá obras de illamento acústico nas vivendas incluídas na servidume acústica do aeroporto de Alvedro. Segundo comunica o Concello, tras as alegacións e demandas presentadas, as persoas afectadas —especialmente no núcleo de Montrove— están a recibir nas súas casas unha carta informativa na que se lles ofrece asumir sen custo as intervencións necesarias.

AENA enviará un técnico a cada domicilio que o solicite co obxectivo de realizar as medicións oportunas e determinar as solucións a aplicar. Como pauta xeral, as actuacións centraranse en dormitorios e salóns, aínda que poderían estenderse a outras estancias segundo as necesidades detectadas.

O proceso será totalmente gratuíto para os veciños e veciñas beneficiarios. Para poder optar ás obras, é imprescindible cubrir a solicitude indicada na comunicación remitida aos domicilios. O Concello anima a tramitar o pedido canto antes para axilizar as visitas técnicas e a posta en marcha dos traballos.