Activa a alerta laranxa por temporal costeiro no litoral da provincia da Coruña
A Xunta activa a alerta laranxa por temporal costeiro nos litorais da provincia da Coruña, especialmente no oeste e suroeste, e sendo amarela, no noroeste. Co fin de garantir a seguridade dos bens e das persoas, a Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde a tarde do día 8 de marzo no oeste da Coruña, estendéndose na madrugada do día 9 ao suroeste da costa coruñesa e ao litoral de Pontevedra por vento do suroeste de forza 8 e mar combinada do oeste ou suroeste con ondas de ata seis metros.
Ademais, a Secretaría Xeral para o Deporte suspende este 8 de marzo a actividade deportiva federada no mar en diversas áreas da Coruña debido á alerta laranxa por fenómeno costeiro, segundo as previsións dos órganos predictores.
O Concello da Coruña avisa de que debido á alerta amarela por vento, a partir das 17.00 horas deste sábado 8 de marzo e ata o domingo 9 de marzo ás 9.00 horas, os parques e xardíns da Coruña permanecerán pechados.