Abre o prazo en Arteixo para os concursos de Entroido con máis de 10.700 euros en premios
O Concello de Arteixo abriu o prazo de inscrición para participar nos concursos do Entroido 2026, unha das citas máis multitudinarias do calendario festivo local. A convocatoria inclúe o concurso infantil e os certames de Carrozas, Comparsas e Disfraces de Adultos, cunha bolsa global de 10.770 euros en premios, na que se incorpora tamén o galardón 'Choqueiro' para recoñecer o enxeño máis tradicional.
Segundo a información municipal, o prazo xeral para anotarse remata o 9 de febreiro ás 14.00 horas, aínda que nas categorías infantil e de adultos individuais permítese inscribirse tamén o propio día da celebración.
As persoas interesadas poden tramitar a inscrición a través da sede electrónica do Concello, mentres que a presentación presencial pode facerse no Centro Cívico Cultural Manuel Murguía. No caso das persoas xurídicas, a inscrición deberá realizarse obrigatoriamente por vía telemática.
A programación prevé que o Concurso Infantil se celebre o luns 16 de febreiro no Campo da Festa, dirixido a menores de 16 anos en categorías individual, parellas e grupos. Ao día seguinte, o martes 17 de febreiro, terá lugar o gran desfile pola avenida de Fisterra, no que se valorarán aspectos como a orixinalidade, o vestiario e a posta en escena.
As bases completas da convocatoria poden consultarse na web municipal.