Abre o prazo de inscrición para o programa Lecer Educativo nos centros públicos da Coruña
O Concello da Coruña abriu esta semana o prazo de inscrición no programa Lecer Educativo, unha iniciativa de actividades complementarias para nenos e nenas matriculadas nos centros públicos e impulsada polo Goberno de Inés Rey a través do plan Coruña Educa, que está xestionado pola Federación de ANPA de centros públicos da Coruña.
O obxectivo deste programa é promover un desenvolvemento integral na infancia e na mocidade, abranguendo tanto o aspecto físico como o cultural e o socioemocional. O xogo e a diversión serán fundamentais ao tratarse de actividades de tempo libre. Para o vindeiro curso 2024/2025 haberá catro programas diferentes: Cóxegas, Deporte no Centro, Arte e Cultura no Centro e Idiomas no Centro. A inscrición para os distintos programas pode realizarse en www.fedapascoruna.org.
O programa Cóxegas, cuxa inscrición está aberta ata o 3 de setembro, ofrece unha solución para a conciliación familiar e laboral no propio centro educativo ao longo de tres semanas no mes de setembro. A rapazada gozará de xogos, deportes e actividades lúdicas participando nunha emocionante aventura onde se promoven hábitos e normas de convivencia e o fomento o desenvolvemento cognitivo, psicomotor e social.
Deporte no Centro, pola súa banda, promove o poder do deporte para o desenvolvemento completo da rapazada, xa que non só promove a actividade física, senón que tamén ensina valores e habilidades fundamentais. Os obxectivos principais son o gozo, a participación inclusiva, os hábitos saudables, o desenvolvemento de habilidades e o uso positivo do tempo libre. A metodoloxía activa garante que todo o alumnado estea cómodo e goce plenamente das actividades, independentemente do seu nivel. A inscrición está aberta ata o 15 de setembro.
Por outra banda, Arte e Cultura no Centro ofrece unha experiencia educativa que complementa a xornada escolar dos nenos e nenas, promovendo o seu desenvolvemento integral a través de actividades artísticas e culturais nunha contorna lúdica. A inscrición está aberta ata o 15 de setembro.
Por último, Idiomas no Centro é unha proposta de lecer centrada na aprendizaxe de inglés e francés de forma divertida. O programa distínguese por ser unha actividade complementaria cun enfoque lúdico, onde os estudantes participan activamente. Adáptanse as actividades aos intereses dos alumnos, cunha forte énfase no desenvolvemento de habilidades comunicativas prácticas para a vida cotiá. O período de inscrición está aberto ata o 15 de setembro.
Estes últimos tres programas desenvolveranse durante o curso escolar, entre o 2 de outubro de 2024 e o 20 de xuño de 2025, agás nos períodos vacacionais. Toda a información de cada un dos programas e as condicións xerais de participación pódense consultar na seguinte ligazón.