Abre a inscrición de 'Paixón Laranxa', o concurso escolar de cánticos para animar ao Leyma no Coliseum
Este luns 2 de febreiro arrinca o prazo para anotarse en Club Básquet Coruña, que volve promover o concurso escolar de cánticos de animación 'Paixón Laranxa'. A iniciativa, pensada para o alumnado de 5o e 6o de primaria dos colexios da cidade, busca reforzar o vínculo coa bancada a través da creatividade e dunha animación deportiva 'en positivo'.
As inscricións estarán abertas ata o 27 de febreiro. As eliminatorias celebraranse entre o 16 e o 23 de marzo, con probas ligadas aos adestramentos do equipo, e a final disputarase no Coliseum da Coruña o 10 de abril, coincidindo co encontro entre Leyma Coruña e Monbus Obradoiro, previsto ás 20.45 horas.
Os grupos participantes deberán crear un cántico orixinal, cunha letra e un ritmo sinxelos e cunha duración máxima de 30 segundos. O regulamento permite empregar elementos de animación como bombos, tambores ou megáfonos.
A dinámica do concurso combina a gravación dos cánticos e a participación da afección: cada proposta subirase ás redes sociais do club para que o público vote, mentres que o nivel de ruído acadado contará tamén na puntuación (cun peso do 50%).
O colexio gañador recibirá a visita do primeiro equipo no centro, paquetes de merchandising e recoñecemento nas canles oficiais. Sobre o apoio municipal á iniciativa, o concelleiro de Educación, Formación e Innovación Tecnolóxica, Juan Ignacio Borrego, afirmou: 'Apoiamos estas iniciativas que fan cultura de club e axudan a que a xente máis nova sinta esa pertenza'.