Aberto o prazo de preinscrición para os cursos de iniciación ao golf da Coruña
O Concello da Coruña, a través da Concellería de Deportes, vén de activar o prazo de preinscrición para participar nos cursos municipais de iniciación ao golf correspondentes ao primeiro trimestre de 2026. As actividades impartiranse no Campo Municipal de Golf Torre de Hércules durante os meses de xaneiro, febreiro e marzo.
A programación ofrece 136 prazas repartidas por grupos de idade: infantil (de 6 a 11 anos), xuvenil (de 12 a 16) e persoas adultas (a partir dos 17). O Concello establece como criterio de prioridade ás persoas empadroadas na cidade e a quen non participase con anterioridade noutros cursos municipais de golf.
A preinscrición realizarase exclusivamente en liña, a través do formulario dispoñible na web municipal, onde tamén se publicarán as listaxes provisional e definitiva de admitidos. Cada participante poderá solicitar un máximo de dous cursos por orde de preferencia, aínda que só poderá formalizar a matrícula nun deles. Se o número de solicitudes supera as prazas dispoñibles, a adxudicación farase mediante sorteo público conforme ás bases reguladoras.
A formalización da matrícula deberá completarse de maneira presencial no propio Campo Municipal de Golf Torre de Hércules, e requirirá o pagamento da taxa establecida pola ordenanza fiscal. Para realizar o trámite será necesario presentar o DNI e, no caso de menores, tamén o libro de familia e a identificación da persoa titor legal.