Aberta a inscrición para a actividade 'Aventura coas focas' no Aquarium Finisterrae
O vindeiro mércores 26 de marzo, ás 9.00 horas, abrirase o prazo de reserva de prazas para participar nas sesións de abril, maio e xuño da actividade 'Aventura coas focas'. Esta iniciativa de divulgación científica, desenvolvida polo Aquarium Finisterrae, ofrece ás persoas asistentes a oportunidade de coñecer de preto o traballo de coidado e alimentación das focas grises do centro.
Impulsada polo Goberno de Inés Rey no marco da súa aposta pola educación ambiental e o acceso universal á cultura científica, a actividade forma parte da programación de fin de semana do museo coruñés. A proposta permite unha experiencia directa con mamíferos mariños, combinando aprendizaxe e sensibilización sobre a conservación da biodiversidade mariña.
A actividade está dirixida a persoas maiores de 7 anos e ofrece a posibilidade de participar na preparación dos alimentos, así como de acceder ás plataformas exteriores onde se realiza a alimentación e a revisión sanitaria dos animais. Durante o segundo trimestre do ano celebraranse un total de 18 sesións, cunha capacidade máxima de 12 participantes por sesión, sumando así 216 prazas dispoñibles.
'Aventura coas focas' non ten custo adicional ao prezo da entrada ao recinto, pero require reserva previa para todas as persoas asistentes. Os menores deben ir acompañados por unha persoa adulta, que poderá responsabilizarse de ata dous nenos ou nenas.
Esta proposta reforza o papel dos museos científicos coruñeses como espazos de aprendizaxe, ciencia e lecer en familia, ao tempo que promove a sensibilización sobre a importancia da conservación da biodiversidade mariña.