Cultura

O 28 de setembro, a segunda edición da Festa Infinita en Abegondo combinará pop rock dos 80 e 90, hits internacionais e unha sesión remember, nun evento pensado para públicos de todas as idades

O Concello de Abegondo organiza a segunda edición da súa Festa Infinita, que terá lugar o sábado 28 de setembro na Finca As Quintás, situada na parroquia de Abegondo. Este evento, deseñado como peche da tempada estival, promete unha noite cargada de música, entretemento e servizos para todos os públicos.

A partir das 19.30 horas, tres actuacións destacadas marcarán a xornada: La Banda de ayer, que traerá ao escenario éxitos de pop rock dos anos 80 e 90, Broken Peach, que presentará o seu novo traballo 'Welcome to Brokenland' e interpretará coñecidos hits internacionais, e o DJ Toni Seijas, encargado de poñer o broche final cunha sesión remember que evocará grandes éxitos do pasado.

Ademais da oferta musical, o recinto contará cunha cantina e food trucks para satisfacer o apetito dos asistentes durante toda a noite, garantindo unha experiencia completa tanto para o público máis novo como para os nostálxicos que queiran revivir grandes momentos musicais.

A Festa Infinita en Abegondo consolidouse como un evento clave no calendario cultural do concello, cunha proposta variada e accesible para todos os veciños e visitantes.