Abegondo acollerá a XXVI Mostra de Cans de Caza con exemplares de primeiro nivel
Este domingo 15 de xuño, Abegondo converterase nun punto de encontro para os amantes da caza e da cinofilia coa celebración da vixésimo sexta edición da Mostra de Cans de Caza. A cita, organizada pola Asociación de Cazadores de Abegondo coa colaboración do Concello, terá lugar na finca As Quintás a partir das 11.00 horas.
A mostra permitirá contemplar algúns dos mellores exemplares de cans de caza, procedentes de diferentes puntos, nun ambiente pensado para poñer en valor tanto a calidade dos animais como o traballo dos criadores e afeccionados.
Como colofón da xornada, terá lugar a tradicional entrega de premios, que recoñecerá os mellores participantes en distintas categorías: caza maior, caza menor (pelo e pluma), mellor can individual, mellor lote e mellor camada.
As persoas interesadas en participar poden inscribirse a través do número de teléfono 669 841 452. Para poder competir, os cans deberán cumprir coa normativa vixente e contar con microchip identificativo, cartilla sanitaria ao día e a documentación correspondente.
Esta mostra consolídase ano tras ano como un dos eventos destacados do calendario cinexético da comarca, promovendo a convivencia e o intercambio de experiencias entre criadores, cazadores e público en xeral.