Abegondo acolle este sábado o Belén Vivente en patíns no pavillón de San Marcos
O pavillón municipal de San Marcos será escenario este sábado, 20 de decembro, dunha nova edición do Belén Vivente en patíns, unha proposta cultural e festiva que se consolida como unha das actividades máis singulares do Nadal en Abegondo.
A partir das 19.00 horas, os membros da Escola Municipal de Patinaxe ofrecerán unha función especial na que o deporte e a tradición se darán a man, acompañados pola música e o baile do Grupo de Gaitas e Baile do Concello de Abegondo.
O evento contará tamén coa participación de Hugo Torreiro, gañador do concurso da TVG 'Xa temos canción do Nadal 2025!', que achegará un toque musical destacado a unha xornada pensada para todos os públicos.
Desde o Concello animan á veciñanza a achegarse ao pavillón e gozar dunha tarde chea de espírito nadalicio, música e espectáculo.