Abegondo, Carral e Oza-Cesuras impulsarán programas para maiores co apoio da Deputación
Os concellos de Abegondo, Carral e Oza-Cesuras forman parte do grupo de 21 municipios da provincia que contarán con apoio económico da Deputación da Coruña para desenvolver iniciativas dirixidas ás persoas maiores.
A través da convocatoria FOEAC-2/2025, a institución provincial destina un total de 133.568 euros para programas que fomenten a participación social, a autonomía e o benestar da veciñanza de máis idade, con especial atención ao rural.
No caso destes tres municipios, as actividades previstas inclúen obradoiros de memoria, propostas interxeracionais, cursos de novas tecnoloxías e encontros culturais, iniciativas que permitirán reforzar a estimulación cognitiva, mellorar a saúde emocional e favorecer a creación de vínculos sociais.
O presidente da Deputación, Valentín González Formoso, subliñou que o obxectivo destas medidas é “facer das persoas maiores protagonistas activos das súas vilas, garantindo que a idade ou o lugar de residencia non sexan un obstáculo para levar unha vida plena”.
Con este apoio, Abegondo, Carral e Oza-Cesuras dan un paso máis na súa aposta pola atención ás persoas maiores, sumándose a un plan que busca combater o illamento e fortalecer a cohesión comunitaria en toda a provincia.