A Xunta sorteará 40 vivendas públicas en Xuxán, na Coruña, con alugueiros desde 97,37 euros
A Xunta realizará este venres 16 de xaneiro o sorteo de 40 vivendas de promoción pública que está a construír no barrio de Xuxán, na Coruña. O procedemento desenvolverase ante notario ás 11.00 no salón de actos do edificio administrativo de Monelos e servirá para a adxudicación provisional dos fogares en réxime de alugueiro.
Segundo a información facilitada, as rendas mensuais previstas oscilarán entre os 97,37 e os 312,68 euros. A actuación conta cun investimento de 7,7 millóns de euros e inclúe un edificio de cinco plantas con vivendas de 2 a 4 dormitorios, ademais de prazas de garaxe e rochos. Un 40% das vivendas quedará reservado para mozos menores de 36 anos.
Na construción estanse a aplicar técnicas industrializadas, especialmente nas fachadas e na estrutura, unha fórmula coa que a Xunta busca gañar axilidade na execución e mellorar a sostibilidade e a seguridade durante a obra.
O sorteo comezará pola quenda das vivendas adaptadas para persoas con mobilidade reducida. No caso da quenda xeral, organizaranse lotes en función do número de dormitorios e realizarase un sorteo específico para cada un deles.
Unha vez completado o proceso, publicarase a listaxe provisional de adxudicatarios e abrirase un prazo de 10 días para presentar reclamacións. Despois difundirase a listaxe definitiva e establecerase outro prazo de 10 días para aceptar ou renunciar á vivenda.
Entre os requisitos para optar a estes alugueiros figura estar inscrito no Rexistro Único de Demandantes de Vivenda co concello da Coruña como municipio preferente, ademais de residir ou traballar nel. Tamén se esixe non dispoñer dunha vivenda en propiedade e acreditar uns ingresos ponderados por unidade familiar ou convivencial, no último exercicio fiscal vencido, entre 0,7 e 3 veces o IPREM.