A Xunta reprocha á alcaldesa da Coruña que lle derive a responsabilidade sobre os VTC
A Xunta de Galicia expresou a súa sorpresa polas recentes declaracións da alcaldesa da Coruña, Inés Rey, nas que apuntaba á Administración autonómica como responsable de cuestións vinculadas aos vehículos de turismo con condutor (VTC), unha materia que, segundo o Goberno galego, é de estrita competencia municipal cando se trata de servizos urbanos.
O conselleiro de Presidencia, Xustiza e Deportes, Diego Calvo, instou á rexedora herculina a asumir as súas funcións neste ámbito: “como máxima responsable municipal, tome as decisións que considere oportunas na cidade respecto das VTC e se poña a traballar para regular no ámbito municipal, deixando a un lado a confrontación coa Administración autonómica”.
Calvo explicou que a Xunta tramita as autorizacións de VTC domiciliadas en Galicia por delegación de competencias do Estado. Estas licenzas teñen carácter autonómico e interurbano, polo que non habilitan para realizar servizos estritamente urbanos, aínda que si permiten desprazamentos entre distintos municipios galegos.
Desde a Consellería lembran que foi o Estado quen modificou a normativa en 2023, establecendo límites á concesión de novas licenzas en base a criterios ambientais e de conxestión de tráfico, agás no caso de vehículos considerados “cero emisións”. En todo caso, apuntan que a Xunta non outorga permisos a plataformas de intermediación, xa que a súa función limítase a tramitar licenzas individuais sempre que se cumpran os requisitos legais.
En canto á inspección, o conselleiro destacou que “os axentes velan polo cumprimento da norma, remitindo os informes que correspondan aos concellos no caso de detectar incumprimentos que a Administración autonómica non pode sancionar, como é o caso da realización de tráficos urbanos por VTC”. É dicir, segundo recalcou Calvo, a potestade sancionadora en caso de infraccións en servizos urbanos recae nos propios concellos.
Así mesmo, desde a Xunta lembran que a Lei 4/2013 do transporte público de persoas en vehículos de turismo de Galicia recolle que os concellos teñen a competencia para outorgar autorizacións habilitantes para o servizo urbano, sempre que os solicitantes conten cunha licenza interurbana xa concedida.
A Administración autonómica afirma tamén ter remitido recentemente unha comunicación a todos os titulares de licenzas VTC na comunidade para recordar as obrigas legais, e anunciou novas accións coordinadas con concellos, policías locais e axentes da Garda Civil para reforzar os labores de inspección.
Ante este panorama, Diego Calvo concluíu asegurando que a Xunta cumpre coa súa responsabilidade e coa normativa vixente, polo que reclamou á alcaldesa da Coruña que “se non quere cumprir coas súas, non intente escudarse na Administración autonómica”.