A Xunta reivindica na Coruña o labor esencial do voluntariado da AECC no apoio a pacientes oncolóxicos
O conselleiro de Sanidade, Antonio Gómez Caamaño, participou este sábado na Coruña no acto de conmemoración do Día do Voluntariado organizado pola Asociación Española contra o Cancro, no que puxo en valor o papel esencial das persoas voluntarias no acompañamento a pacientes oncolóxicos e ás súas familias como complemento imprescindible da atención sanitaria.
Gómez Caamaño subliñou que a presenza dos voluntarios e voluntarias da AECC nos hospitais, nas unidades de día e mesmo nos propios domicilios dos pacientes 'serve para dar forza e consolo a quen máis o precisa', creando espazos seguros nos que se senten comprendidos e escoitados. En Galicia son máis de 800 as persoas que colaboran coa entidade, ofrecendo apoio emocional e información útil ás persoas que se enfrontan a un proceso de cancro.
O titular de Sanidade remarcou que esta entrega constitúe un dos piares da actividade da AECC e, ao mesmo tempo, un apoio fundamental para a propia Consellería, ao permitir coñecer mellor as necesidades reais das persoas enfermas e das súas familias. Por iso, expresou a súa honra polo recoñecemento que lle concedeu a asociación, convencido de que Xunta e AECC comparten 'obxectivos comúns e a mesma vontade de mellorar a vida das persoas'.
No seu discurso, o conselleiro salientou iniciativas concretas como o proxecto Carrito Don Amable no Centro Oncolóxico de Galicia ou as visitas ás unidades de día, que cualificou de 'pequenos xestos cun enorme impacto no benestar emocional das persoas doentes'. Tamén puxo en destaque o labor que realiza o voluntariado na Unidade de Coidados Paliativos do Hospital Marítimo de Oza, onde acompañan tanto a pacientes coma a familiares en momentos especialmente delicados.
Gómez Caamaño insistiu en que o traballo da Asociación Española contra o Cancro combate a enfermidade 'desde a primeira liña e desde todos os ángulos', combinando ciencia, prevención e investigación cun trato próximo, humano e integral ás persoas afectadas.
O responsable de Sanidade enmarcou este labor no esforzo que, segundo dixo, está a realizar a Xunta na loita contra o cancro, unha prioridade sanitaria de primeira orde para o Executivo galego. Nese sentido, lembrou os programas de prevención e cribado en marcha, así como o investimento en equipamento de última xeración e nas terapias máis avanzadas para incrementar as oportunidades de cada paciente.
Para pechar a súa intervención, o conselleiro agradeceu de novo o traballo diario da AECC e definiu a entidade como 'aliada imprescindible da Xunta de Galicia' na atención ás persoas con cancro e á súa contorna máis próxima.