A Xunta propón conservar in situ os murais de Lugrís na rúa Olmos co apoio do Concello da Coruña
A Xunta de Galicia mantivo unha xuntanza co Concello da Coruña para avanzar na creación dun espazo específico, o Espazo Lugrís, nos números 25 e 27 da rúa Olmos. O obxectivo é preservar no seu emprazamento orixinal o conxunto mural do artista Urbano Lugrís, obra que xa conta cun procedemento aberto para a súa declaración como Ben de Interese Cultural (BIC).
No encontro, que tamén convocou á Deputación da Coruña, o conselleiro de Cultura, Lingua e Xuventude, José López Campos, defendeu que esta solución é a máis axeitada tanto desde o punto de vista económico como da conservación do conxunto. A proposta enmárcase no cumprimento do acordo unánime do Parlamento de Galicia aprobado o pasado mes de abril, que instaba ao Goberno galego a iniciar un diálogo institucional sobre o futuro das obras.
Durante a reunión, López Campos presentou as conclusións dun informe técnico elaborado pola Dirección Xeral de Patrimonio Cultural, que analiza en detalle o estado dos murais e as distintas opcións para a súa restauración. Segundo o documento, o traslado das pinturas implicaría un elevado risco para a súa integridade, xa que se trata dunha obra concebida especificamente para ese espazo arquitectónico e algúns fragmentos non poderían ser extraídos sen cortar parte da pintura nin modificar a estrutura do edificio.
Ademais dos riscos técnicos, a opción do traslado suporía un custo superior a 1,2 millóns de euros, mentres que a restauración no propio inmoble permitiría conservar a esencia orixinal da obra cun investimento moito menor.
Cómpre lembrar que a Xunta exerceu o dereito de tanteo recollido na Lei de Patrimonio Cultural para adquirir as obras por 36.000 euros, igualando a oferta dun particular. Esta operación permitiu garantir a unidade do conxunto mural e asegurar que pase a formar parte do patrimonio público, co compromiso de restauralo e facelo accesible á cidadanía.
O proceso de protección avanza paralelamente. En marzo de 2024, o Diario Oficial de Galicia publicou a incoación do expediente para declarar BIC os murais de Lugrís na categoría de monumento. Os informes técnicos destacan a calidade artística e a singularidade deste conxunto, único no contexto da obra do autor coruñés, e sinalan a súa relevancia como testemuño do seu dominio da composición e a decoración de interiores.
Con esta iniciativa, a Xunta de Galicia reafirma o seu compromiso coa protección do patrimonio artístico e coa posta en valor da obra de Urbano Lugrís, cuxa conservación no seu espazo orixinal permitirá manter viva a súa memoria e facilitar o acceso público a unha das xoias artísticas da cidade.