A Xunta pon en valor as Mesas de comercio local para acordar medidas co sector
O director xeral de Comercio e Consumo, Gabriel Alén, participou este 20 de febreiro na Mesa de comercio local de Betanzos e asistiu tamén á de Curtis, dúas reunións nas que a Xunta salientou a utilidade destes foros para axustar as políticas públicas á realidade de cada concello e reforzar a cooperación co tecido comercial.
Na xuntanza de Betanzos analizáronse proxectos de dinamización previstos para 2026 e avaliáronse propostas orientadas a fortalecer o comercio da vila, co obxectivo de consolidar a venda de proximidade como motor da actividade económica local.
Durante o encontro, Alén lembrou liñas de apoio autonómico como as dirixidas a impulsar mercados e prazas de abastos e destacou as axudas, en prazo ata o 12 de marzo, destinadas a apoiar as actuacións dos centros comerciais abertos. Segundo a Xunta, esta convocatoria conta cun orzamento de 2,5 millóns de euros e busca reforzar a capacidade destas entidades para dinamizar as contornas comerciais.
Xa en Curtis, o responsable autonómico reuniuse con representantes do sector para seguir avanzando en actuacións adaptadas ás necesidades do municipio. A Xunta enmarca estas mesas no Plan estratéxico do comercio de Galicia 2025-2030 e defende que son unha vía eficaz para anticipar retos e impulsar accións con impacto real no territorio.