A Xunta ofrece axudas para reparar os danos dos incendios en espazos protexidos da Coruña e simplifica a prevención
A conselleira Ángeles Vázquez reuniuse con representantes de medio cento de municipios para concretar un paquete de axudas dirixido a concellos e montes veciñais en man común co fin de restaurar sendas, áreas recreativas e instalacións de interpretación danadas en espazos da Rede Natura e Reservas de biosfera. Os montes veciñais poderán solicitar ata 20.000 € e os concellos ata 40.000 €, e prevese apoio adicional aos Tecores para sementeiras de cereais e a reparación de refuxios, comedeiros e cercados.
A Xunta avanzou ademais melloras na prevención: simplificarase a tramitación de rozas e queimas controladas e permitirase, co permiso correspondente, a realización de lumes técnicos entre marzo e maio. Tamén se amplían os límites máximos de intervención: as rozas poderán abarcar o 30% da matogueira (antes 20%) e as queimas controladas chegar ao 10% (antes 5%).
No ámbito agrario, a Administración propón facilitar a recuperación de uso agrícola en parcelas forestais sen aproveitamento sen necesidade de autorización, eximir de avaliación ambiental as talas imprescindibles para ese retorno e evitar que os terreos historicamente agrícolas pasen automaticamente a uso forestal tras 40 anos de abandono.