A Xunta licita a reposición do pavimento do pantalán flotante do porto de Lorbé
O porto de Lorbé (Oleiros) será unha das instalacións incluídas no plan da Xunta para renovar o pavimento de pantaláns flotantes en distintos puntos do litoral galego. Portos de Galicia publicou a finais de decembro o anuncio de licitación das obras de ‘Reposición de pavimentos en instalacións flotantes en varios portos’ (expediente PRG-2025-0069), un procedemento aberto para contratar estes traballos.
Segundo explicou o deputado do Grupo Popular Jesús María Fernández Rosende, a actuación responde ao deterioro que provocan o mar e a climatoloxía sobre materiais como a madeira, un desgaste que pode xerar riscos para o tránsito por pantaláns e fingers. O parlamentario sinalou que Lorbé figura entre os dez portos onde se prevé a renovación do pavimento ao longo de 2026.
A intervención, segundo o PPdeG, suporá un investimento próximo aos 640.000 euros e permitirá substituír o piso actual por un material máis resistente tipo Ecotek. No listado inclúense, ademais de Lorbé, Muxía, Muros, A Barquiña-Outes, Ribeira, A Pobra do Caramiñal, Carril, Vilanova de Arousa, O Grove e Baiona.
No tocante ao calendario do concurso, plataformas que replican a información do perfil de contratación sitúan o prazo de presentación de ofertas ata o 26 de xaneiro de 2026 (23.59 horas), con un orzamento de licitación que se move arredor dos 638.000 euros.