A Xunta inviste máis de 123.000 euros na mellora das infraestruturas rurais de Irixoa
A Xunta de Galicia destina máis de 123.000 euros á mellora das infraestruturas rurais do concello de Irixoa dentro do Plan Marco de Mellora de Camiños Rurais, unha iniciativa que busca facilitar o acceso ás parcelas agrícolas e forestais, mellorando a competitividade do sector agrario. A delegada territorial da Xunta na Coruña, Belén do Campo, visitou hoxe o municipio acompañada polo alcalde Antonio Deibe para avaliar os investimentos que permitirán a renovación e mellora de varios camiños rurais estratéxicos para as explotacións locais.
A actuación máis destacada é a mellora do firme no viario de Lousada de Arriba, cunha axuda específica de 61.400 euros que permitirá acondicionar esta vía e mellorar o acceso a parcelas de uso agrícola. Esta intervención súmase ao investimento realizado o ano pasado na zona, onde se renovou o firme do camiño Campoade-Quintá cun orzamento de 61.600 euros, garantindo un acceso máis seguro e eficiente para a maquinaria agrícola. Segundo Do Campo, estas actuacións demostran o compromiso da Xunta por apoiar o desenvolvemento das zonas rurais e asegurar que contan con infraestruturas axeitadas para o traballo diario no campo.
Durante a súa visita, a delegada destacou que o Plan Marco para os anos 2024 e 2025 está dotado con case 19,5 millóns de euros, o que representa o orzamento máis elevado dende a súa posta en marcha en 2017. Estes fondos permitirán actuar en máis concellos e mellorar un maior número de camiños. Na comarca de Betanzos, serán un total de 16 os municipios que recibirán axudas por un importe total de máis de 1 millón de euros, co obxectivo de seguir potenciando as infraestruturas rurais e forestais, o que se traducirá nunha maior axilidade das operacións agrícolas e nunha redución dos custos de produción.
O Plan Marco enmárcase dentro da estratexia global da Xunta para o desenvolvemento rural, e ten como finalidade principal asegurar que as explotacións galegas teñan acceso a vías en bo estado, facilitando así o transporte de produtos agrícolas e forestais, e contribuíndo á competitividade do sector. Desde 2016, o plan contou cunha dotación orzamentaria de máis de 130 millóns de euros, permitindo a mellora de máis de 5.450 camiños en toda Galicia e actuando en máis de 4.280 quilómetros de vías rurais. A provincia da Coruña foi a que recibiu maior número de investimentos neste período, cun total superior aos 40 millóns de euros.
Por outra banda, Belén do Campo subliñou que este ano, por primeira vez, o Plan Marco compleméntase co novo Plan de Rehabilitación de Camiños de Zonas de Concentración Parcelaria, dotado con 6 millóns de euros, co fin de dar resposta ás necesidades de camiños en zonas onde se completaron procesos de reestruturación parcelaria. Esta nova liña de axudas contribuirá a mellorar as comunicacións e o acceso en áreas nas que as infraestruturas son especialmente importantes para manter a viabilidade das explotacións.