A Xunta impulsa preto de 400 vivendas protexidas con 3,8 millóns de euros en axudas e 177 pisos en marcha en Someso
A Xunta de Galicia activou unha liña de axudas con fondos propios de 3,8 millóns de euros destinada a cooperativas e promotores para levantar preto de 400 vivendas protexidas nas provincias da Coruña e Pontevedra. Durante unha visita ás parcelas de Someso (A Coruña), a conselleira de Vivenda e Planificación de Infraestruturas, María M. Allegue, confirmou que neste ámbito xa están en marcha 177 pisos baixo fórmula cooperativa, cun apoio público de 1,8 millóns de euros.
En concreto, Terrazas de Ézaro executa 80 vivendas protexidas —en obra desde maio— cunha achega autonómica de 800.000 euros; e Mirador de Ézaro levantará 97 vivendas cun apoio de 970.000 euros, cuxos traballos comezarán a finais de ano. Allegue subliñou que a convocatoria —co prazo de solicitude aberto ata esta noite— nace para incentivar tanto promoción en alugueiro como en venda, e solicitou ao Goberno central que incorpore tamén a modalidade de venda no Plan Estatal de Vivenda, ao considerar que en Galicia a aposta exclusiva polo alugueiro “non está a funcionar” como motor suficiente.
A titular de Vivenda lembrou, ademais, que a Xunta redobra esforzos na mobilización de solo e promoción directa: 205 vivendas en execución en Xuxán, Porticada, Pedro Fernández e Os Rosais, e habilitación de solo para 4.310 fogares en Monte Mero. “Tras escoitar ao sector, esta liña está a dinamizar a construción privada de vivenda protexida e a acelerar a oferta accesible en áreas de alta demanda”, concluíu.