A Xunta impulsa melloras en 22 centros educativos da Coruña con distintas actuacións
A Consellería de Educación, Ciencia, Universidades e Formación Profesional continúa coa transformación dos espazos educativos na cidade da Coruña a través dun ambicioso plan de actuacións en 22 centros escolares, cun investimento global que supera os 18,6 millóns de euros. As obras inclúen reformas integrais, renovacións de cubertas, melloras en accesibilidade e modernización de infraestruturas.
Durante unha visita ao IES Salvador de Madariaga, o conselleiro Román Rodríguez anunciou a licitación da cuberta da súa pista exterior, cun orzamento de máis de 511.000 euros. Esta obra súmase ás melloras que xa se están a executar no centro, como a renovación de cubertas, a substitución de carpinterías e a reparación de fachadas.
O plan tamén abrangue actuacións xa finalizadas, como a reforma do salón de actos do CIFP Imaxe e Son (927.000 euros), o cambio de fiestras no IES Agra do Orzán (291.000 euros) e as renovacións de cubertas no CEIP María Pita (369.000 euros), IES A Sardiñeira (401.000 euros), IES Fernando Wirtz Suárez (598.000 euros) e IES Ramón Menéndez Pidal (724.000 euros).
Entre os proxectos actualmente en execución destacan a rehabilitación integral do IES Plurilingüe Rafael Dieste (1,7 millóns), a mellora do propio IES Salvador de Madariaga (1,7 millóns) e a instalación de ascensores no CEIP San Francisco Javier, CEIP Víctor López Seoane e nos IES Monte das Moas e Urbano Lugrís.
Ademais, estanse a licitar ou redactar os proxectos doutras intervencións clave, como as rehabilitacións dos CEIP Sagrada Familia e Víctor López Seoane, a mellora de cubertas no CEIP Sal Lence, CIFP Someso e CEIP San Pedro de Visma, ou a reforma integral do IES Eusebio da Guarda, cun investimento previsto de 2,3 millóns.
Segundo a Xunta, todas estas actuacións están incluídas no Plan de Nova Arquitectura Pedagóxica e teñen como finalidade adaptar os centros á realidade educativa actual, garantindo espazos accesibles, eficientes e de calidade para toda a comunidade escolar coruñesa.