A Xunta esixe ao Goberno que asuma as compensacións ás mariscadoras da ría do Burgo
A Consellería do Mar critica a negativa do Estado a asumir integramente as compensacións económicas para as persoas mariscadoras da ría do Burgo, cualificando a súa postura de "irresponsable". O Executivo central ofrece cubrir só a metade das axudas, o que a Xunta interpreta como un intento de "botar balóns fóra" e evitar as súas obrigas como promotor único das obras de dragaxe nesta zona produtiva. Ademais, sinalan que esta oferta contrasta coa súa reiterada ausencia nas reunións convocadas pola confraría.
Desde a Xunta lembran que o pasado 27 de xaneiro enviaron unha carta de resposta ao secretario de Medio Ambiente, Hugo Morán, instando o Ministerio para a Transición Ecolóxica e o Reto Demográfico (Miteco) a corrixir as deficiencias detectadas na execución da obra. Segundo un informe técnico da confraría, 24 dos 27 bancos marisqueiros quedaron en peor estado tras a intervención, afectando todas as zonas de marisqueo a flote e 20 dos 23 bancos de marisqueo a pé.
O informe detalla problemas como a redución das superficies produtivas, cambios na batimetría, modificacións nas características granulométricas e danos causados pola maquinaria pesada. Esta situación compromete seriamente o futuro do sector marisqueiro e xera unha gran incerteza para as persoas afectadas.
A Xunta tamén acusa ao Goberno central de "insensibilidade" cara ás 70 familias prexudicadas, afirmando que trata as mariscadoras como "dano colateral" e pretende que sexa a Administración autonómica quen asuma os efectos das obras realizadas por outros. A posición da Xunta está avalada por un informe da Universidade de Santiago de Compostela, que conclúe que a responsabilidade do pagamento das axudas recae no promotor dos traballos de dragaxe.
O Executivo galego reitera o seu apoio ás demandas do sector e insiste en que as compensacións deben cubrir o período de inactividade ata que os bivalvos sementados alcancen tamaño comercial. Recordan que esta obriga está recollida na declaración de impacto ambiental publicada no BOE o 27 de setembro de 2017, un punto que, segundo denuncian, o Goberno central está a incumprir de xeito "flagrante".