A Xunta e o Concello de Oza-Cesuras avanzan na mellora dos camiños rurais
A conselleira do Medio Rural, María José Gómez, mantivo esta semana unha xuntanza en San Caetano co alcalde de Oza-Cesuras, Pablo González Cacheiro, co obxectivo de fortalecer a colaboración entre ambas administracións para mellorar a rede de camiños rurais do municipio. Esta actuación enmárcase no Plan Camiña Rural 2025-2026, unha iniciativa da Xunta dotada con preto de 19,5 millóns de euros para o conxunto de Galicia.
Durante o encontro, tanto a conselleira como o rexedor coincidiron en destacar a importancia de "a cooperación institucional para mellorar estas infraestruturas rurais, claves na mobilidade das persoas e das mercadorías", e en especial para favorecer a actividade forestal nun concello cunha notable produción madeireira.
O Plan Camiña Rural busca apoiar aos concellos galegos no financiamento de proxectos que melloren ou manteñan camiños municipais que conecten con, polo menos, dúas parcelas agrícolas ao longo do seu percorrido. As axudas abranguen actuacións de ampliación —que melloren a seguridade viaria e faciliten o cruce de vehículos—, mellora do firme e adaptación de pasos fluviais, así como tarefas de mantemento das vías e as súas marxes.
Na reunión tamén se avaliaron os avances nos procesos de concentración e reestruturación parcelaria no termo municipal. Oza-Cesuras conta xa con 18 zonas finalizadas, cunha superficie que supera as 7.900 hectáreas. A maiores, existen outros dous procesos abertos, ambos en fase de acordo, que suman unhas 2.628 hectáreas adicionais.
Esta colaboración entre a Xunta e o Concello supón un novo paso na aposta por mellorar a calidade de vida da poboación rural e favorecer o aproveitamento eficiente do territorio galego.