A Xunta defende o acceso social ás vivendas de Galivivienda mentres o BNG denuncia falta de transparencia
O secretario xeral de Vivenda e Urbanismo, Heriberto García Porto, destacou a intervención da Xunta de Galicia para asegurar que as 224 vivendas protexidas promovidas pola cooperativa Galivivienda en Xuxán manteñan o seu carácter social, fronte ás dificultades derivadas das modificacións no financiamento do Instituto de Crédito Oficial (ICO). Segundo García Porto, o Goberno autonómico actuou para que as condicións de acceso ás vivendas non desvirtuasen o seu carácter social, tras un cambio nas condicións do préstamo que obrigaba a desembolsos elevados nos primeiros dez anos de ocupación.
A Xunta lembra que licitou e adxudicou o solo a Galivivienda cun canon simbólico e concedeu máis de 10 millóns de euros en axudas de fondos europeos, en procedemento público e non competitivo. García Porto sinalou que, tras a inacción do Ministerio, foi posible que o ICO reconsiderase a súa posición para volver a un esquema de financiamento máis próximo á proposta inicial, condicionado á aclaración sobre a prórroga dos fondos europeos do Plan de Recuperación, vixentes ata 2026.
En paralelo, algúns cooperativistas presentaron reclamacións ante a situación creada. A Xunta subliña que dá asesoramento e procura solucións para mellorar o acceso á información e facilitar o financiamento, mais non pode resolver disputas internas entre socios, que deben ser decididas en asemblea.
Pola súa banda, a deputada do BNG, Alexandra Fernández, denunciou na Comisión de Ordenación Territorial que a Xunta avalou unha ‘chapuza legal’ ao permitir a subrogación da cooperativa orixinal nunha nova entidade sen garantir os dereitos sobre o solo e as licenzas, deixando ás familias en situación de indefensión. Fernández criticou tamén os cambios nas condicións do financiamento e a falta de transparencia, que provocaron unha notable diminución de cooperativistas activos, e pediu á Xunta que revise o modelo de adxudicación de solo público para garantir proxectos viables e o obxectivo social da vivenda.