A Xunta de Compensación do Castrillón reivindica a transparencia do proxecto tras un recurso contra o convenio urbanístico
O comunicado da Xunta de Compensación do Castrillón chega despois de que se coñecese a presentación dun recurso ante o TSXG contra o convenio urbanístico aprobado polo Concello no mes de xuño para o desenvolvemento dun ámbito pendente de urbanizar no barrio. A entidade, que agrupa a arredor de 150 propietarios, é a encargada de promover e coordinar o proceso urbanístico nun sector no que, segundo explica, existen dereitos edificatorios recoñecidos desde hai anos e que aínda non se puideron materializar.
Para entender o debate, a Xunta de Compensación distingue entre dúas pezas distintas do procedemento. Por un lado está o convenio urbanístico que, segundo a súa versión, funciona como un marco xeral: serve para ordenar a relación entre as partes e fixar as liñas básicas da actuación. Por outro, está o PERI, Plan Especial de Reforma Interior, que é o documento no que se concretarán os detalles como a ordenación polo miúdo, as solucións técnicas, as fases, as afeccións e os trazados. A entidade subliña que será nese PERI onde se abrirá o período formal de información pública e alegacións, de xeito que a cidadanía poderá presentar propostas e reclamacións cando o plan chegue ao Concello para a súa aprobación inicial, tras superar antes a avaliación ambiental autonómica.
A Xunta de Compensación defende que este desenvolvemento foi especialmente transparente e lembra que, desde o inicio, mantivo reunións coas asociacións veciñais da contorna: Castrillón-Urbanización Soto, O Cruceiro e A Gaiteira, ademais de difundir publicamente as ideas xerais do proxecto. Co mesmo argumento, pide que non se converta nunha ‘arma política’ e que se avalíe con criterios técnicos e urbanísticos.
No seu relato, a entidade sitúa o proceso nun contexto histórico do barrio: asegura que os propietarios cederon hai décadas solo que hoxe é de uso público e do que se beneficia a veciñanza, como os máis de 55.000 metros cadrados do Parque de Oza, os 5.000 metros cadrados do centro deportivo coa piscina municipal, terreos para completar tramos viarios e tamén 840 metros cadrados para a ampliación do Instituto de Monelos.
Por último, a Xunta de Compensación indica que os propietarios sufragaron a redacción da proposta por un equipo multidisciplinar e apunta algunhas claves urbanísticas que, segundo di, guían o deseño: evitar ‘edificios pantalla’, xerar máis espazo público do esixido, mellorar a mobilidade e aplicar criterios de ecoloxía urbana como a regra 3-30-300.