A Xunta adxudica provisionalmente 40 vivendas públicas de alugueiro en Xuxán
A Xunta de Galicia adxudicou este venres de maneira provisional 40 vivendas de promoción pública no barrio de Xuxán, na cidade da Coruña. Ao acto asistiron a conselleira de Vivenda e Planificación de Infraestruturas, María M. Allegue, e a delegada territorial da Xunta na Coruña, Belén do Campo, que tamén visitaron o inmoble tras o sorteo.
Trátase de fogares de 2 a 4 dormitorios, con praza de garaxe e rocho, que se ofertan en réxime de alugueiro con mensualidades que oscilarán entre os 99 e os 307 euros. A Xunta sinala que o procedemento reservou un 40% das vivendas ao cupo de menores de 36 anos e organizouse por lotes segundo o número de dormitorios.
O edificio, indica o Goberno galego, está a executarse con técnicas industrializadas para axilizar os prazos de obra e poñer antes as vivendas a disposición das persoas beneficiarias.
En canto aos seguintes pasos, tras o sorteo publicarase a listaxe provisional de adxudicatarios e abrirase un prazo de 10 días para presentar reclamacións. Despois farase pública a listaxe definitiva e habilitarase outro prazo de 10 días para aceptar ou renunciar á vivenda.
Entre os requisitos para optar a estes alugueiros está figurar inscrito no Rexistro Único de Demandantes de Vivenda co concello da Coruña como municipio preferente, residir ou traballar na cidade, non dispoñer de vivenda en propiedade e acreditar ingresos ponderados da unidade convivencial entre 0,7 e 3 veces o IPREM.
A Xunta engade que actualmente ten 476 vivendas de promoción pública en distintas fases de tramitación e execución na cidade da Coruña.