A Xunta activa a alerta laranxa por temporal costeiro no litoral da Coruña para este luns 12 de xaneiro
A Xunta de Galicia activará este luns 12 de xaneiro a alerta laranxa por temporal costeiro no litoral da provincia da Coruña, ante a previsión dun episodio de mar e vento adverso desde primeiras horas da mañá. O aviso, emitido pola Dirección Xeral de Emerxencias e Interior a través do Centro Integrado de Atención ás Emerxencias (112 Galicia), foi comunicado a concellos coruñeses afectados, deputacións, servizos provinciais, agrupacións de voluntariado de Protección Civil e clubs náuticos, co obxectivo de garantir a seguridade de persoas e bens.
Segundo a información trasladada pola Axencia Estatal de Meteoroloxía (Aemet), agárdase vento do sur ou suroeste de forza 8 e mar combinada do suroeste con ondas que poden acadar os cinco metros.
Como medida preventiva, a Secretaría Xeral para o Deporte anunciou a suspensión da actividade deportiva no mar nos municipios costeiros incluídos nas previsións dos órganos preditores. A restrición afecta tanto á práctica federada como ás actividades do programa Xogade.
Desde a Xunta insístese en evitar achegarse á liña de costa, especialmente a zonas como diques, rompentes e paseos marítimos. Tamén se recomenda extremar a prudencia ante calquera actividade no mar e revisar cabos e amarres das embarcacións. Para seguir a evolución do episodio, a Administración autonómica aconsella consultar a web do CIAE 112, onde se ofrece información meteorolóxica e ligazóns de interese.