A XIII Baixada Popular da Torre de Hércules reunirá a máis de 1.800 participantes
Máis de 1.800 persoas xa se inscribiron na XIII edición da Baixada Popular da Torre de Hércules, a primeira proba do circuíto de carreiras populares Coruña Corre 2025, que se celebrará o sábado 15 de marzo.
A carreira en categoría absoluta dará comezo ás 20.00 horas desde o paseo dos Menhires, cun percorrido de 6,3 quilómetros sobre asfalto que atravesará Durmideiras, a contorna da praia de Santo Amaro e o paseo marítimo, ata chegar ás Ánimas, para regresar á Torre de Hércules, onde estará situada a meta.
A xornada deportiva arrancará ás 17.10 horas coas carreiras das categorías inferiores, con saídas progresivas para nenas e nenos. O concelleiro de Deportes, Manuel Vázquez, lembrou que a inscrición estará aberta ata o domingo 9 de marzo e animou á cidadanía a participar nesta proba que, ano tras ano, reúne a centos de persoas afeccionadas ao deporte e á vida activa.
Como xa é tradición, a carreira completarase coa Andaina Conmemorativa polo Día da Muller, que alcanza a súa quinta edición e forma parte das iniciativas impulsadas polo Goberno de Inés Rey en materia de igualdade. O percorrido, accesible e de aproximadamente cinco quilómetros, comezará ás 20.05 horas no paseo dos Menhires, pouco despois da saída da carreira absoluta.
A concelleira de Benestar Social, Participación e Igualdade, Nereida Canosa, destacou que a inscrición para a andaina é gratuíta e con rexistro previo.