A Volta Feminina levará o ciclismo internacional ata a meta coruñesa
A Coruña formará parte por primeira vez do percorrido de La Vuelta Femenina by Carrefour.es como meta dunha das súas etapas. A cidade será o punto de chegada da terceira xornada da edición de 2026, prevista para o 5 de maio, nun trazado de 121 quilómetros que arrancará en Padrón e que, polo seu perfil, podería resolverse nun sprint do pelotón.
O anuncio foi presentado este luns en Ribeira nun acto no que participou o concelleiro de Deportes, Manuel Vázquez, e no que se deron a coñecer os detalles dunha carreira que se disputará entre o 3 e o 9 de maio. Galicia será o escenario do arranque da competición antes de que a proba continúe por outras comunidades.
A presenza da cidade herculina no trazado da carreira supón un novo paso na proxección deportiva da Coruña, que se incorpora así a unha das grandes citas do calendario internacional do ciclismo feminino. A chegada da etapa permitirá situar a cidade no foco dunha competición de primeiro nivel e reforzar o seu papel como sede de eventos deportivos de ámbito estatal e internacional.
Manuel Vázquez destacou que a elección da Coruña como final dunha etapa de La Vuelta Femenina representa unha oportunidade para seguir dando visibilidade ao deporte feminino e consolidar a aposta municipal por este tipo de competicións. O edil subliñou tamén a importancia de que probas desta relevancia contribúan a avanzar na igualdade dentro do ámbito deportivo e a ampliar a presenza das mulleres nos grandes escaparates competitivos.
A celebración desta etapa chega ademais nun contexto simbólico marcado pola recente conmemoración do 8M, unha data na que o impulso ao deporte feminino gaña especial significado. Neste sentido, a chegada de La Vuelta Femenina encaixa na liña de traballo que o Goberno local vén desenvolvendo nos últimos anos para apoiar competicións femininas e fomentar a práctica deportiva entre as mulleres.