A VII Xuntanza Veciñal de Armentón encheu de sabor e música o barrio cunha gran pulpada
A VII Xuntanza Veciñal de Armentón celebrouse o pasado 14 de setembro cunha gran pulpada que serviu para reunir á veciñanza arredor da mesa e da música. O evento, impulsado pola A.VV. Valle de Armentón coa colaboración do Concello de Arteixo, arrancou cunha sesión vermú e continuou cun menú completo no que o polbo foi o protagonista, acompañado de produtos da terra.
A xornada prolongouse con sorteos e co baile a cargo do Dúo Karamba, que puxo banda sonora a unha tarde de convivencia interxeracional. Desde a organización salientaron o ambiente familiar, a resposta do barrio e o traballo do voluntariado, que fixo posible unha edición marcada polo bo tempo, o bo humor e as gañas de compartir.
A asociación veciñal agradeceu a colaboración do Concello e dos negocios locais, ao tempo que avanzou a súa vontade de manter e mellorar a cita de cara ao vindeiro ano, consolidando Armentón como un foco de dinamización comunitaria no calendario festivo de Arteixo.