A UDC impulsa Empréga-T, un programa para mellorar a empregabilidade do seu alumnado
A Vicerreitoría de Estudantes e Empregabilidade da Universidade da Coruña pon en marcha Empréga-T, un innovador programa de formación para o emprego e o emprendemento dirixido ao alumnado e persoas egresadas da UDC. A través da Unidade de Emprego, esta iniciativa desenvolverase entre febreiro e abril de 2025, ofrecendo obradoiros prácticos orientados a mellorar as oportunidades laborais, tanto no ámbito do emprego por conta allea como no autoemprego.
O programa abordará aspectos clave como a elaboración dun currículum eficaz, as entrevistas de selección, a procura de emprego e prácticas, así como o desenvolvemento de proxectos empresariais. Ademais, incluirá formación específica para afrontar os novos procesos de selección nos que a Intelixencia Artificial xoga un papel fundamental, desde o filtrado de CV ata as probas de selección en empresas.
As sesións terán lugar de forma presencial na Casa do Estudantado do Campus de Elviña (A Coruña) e en distintas instalacións do Campus de Ferrol. A metodoloxía, dinámica e práctica, permitirá unha interacción directa coas persoas formadoras, responsables de Recursos Humanos e especialistas en emprendemento.
O primeiro obradoiro terá lugar o 19 de febreiro e estará centrado na elaboración dun currículum eficaz, ofrecendo claves para destacar habilidades e experiencia de maneira atractiva para as empresas. O 27 de febreiro será a quenda da sesión sobre emprendemento, onde se abordará o perfil das persoas emprendedoras e os primeiros pasos para converter unha idea en negocio.
O 20 de marzo celebrarase un obradoiro dedicado ás probas de selección de persoal, con especial énfase na entrevista de traballo e as estratexias para afrontala con éxito. O 26 de marzo afondarase no proceso de creación dunha empresa, desde a identificación dunha idea ata a planificación dun proxecto empresarial viable.
O 3 de abril tratarase a procura de emprego e prácticas, ofrecendo orientación sobre as mellores canles para acceder ao mercado laboral. Finalmente, o programa pecharase o 9 de abril cun obradoiro sobre o ecosistema emprendedor, no que se analizarán os recursos dispoñibles para aquelas persoas que queiran desenvolver o seu propio proxecto.
A inscrición permanecerá aberta ata as 14.00 horas do día anterior a cada obradoiro. As persoas participantes poderán asistir a todas as sesións ou escoller aquelas que mellor se adapten ás súas necesidades. Como incentivo, quen complete un mínimo de 10 horas de formación poderá solicitar o recoñecemento dun crédito ECTS para as titulacións de grao.
Empréga-T tamén fomentará o contacto directo co tecido empresarial mediante actividades de networking, presentacións corporativas, visitas a empresas, difusión de ofertas de emprego e participación en procesos reais de selección. Con esta iniciativa, a UDC reforza o seu compromiso coa empregabilidade do seu alumnado e co apoio ao emprendemento como motor de desenvolvemento profesional.