A UDC destaca nos Premios da Valedora do Pobo con dous galardóns en igualdade e dereitos das mulleres
A Universidade da Coruña (UDC) brillou na V edición dos Premios da Valedora do Pobo aos mellores Traballos de Fin de Máster (TFM) en materia de igualdade e dereitos das mulleres, ao conseguir os dous únicos galardóns concedidos. As estudantes Iria María Fernández Sánchez e Sarah Lamas foron as protagonistas desta distinción, recoñecida nun acto celebrado no Paraninfo da Reitoría da UDC.
O evento estivo presidido pola valedora do Pobo, María Dolores Fernández Galiño, e contou coa presenza de Ricardo Cao, reitor da UDC; Fabiola García Martínez, conselleira de Política Social e Igualdade da Xunta de Galicia; Sonia Esperanza Rodríguez Boente, coordinadora da Oficina de Igualdade da Universidade de Santiago de Compostela (USC); e Yolanda Rodríguez Castro, directora da Unidade de Igualdade da Universidade de Vigo (Uvigo).
Estes premios, convocados anualmente pola Valedora do Pobo en colaboración coas tres universidades públicas galegas (UDC, USC e Uvigo), teñen como obxectivo recoñecer aqueles traballos que contribúan á promoción da igualdade e os dereitos das mulleres. Segundo destacou o reitor da UDC, Ricardo Cao, esta iniciativa "constitúe un importante incentivo para a introdución da perspectiva de xénero nos distintos ámbitos de coñecemento, fomentando a investigación en temas de xénero por parte do alumnado".
Estudos galardoados: visibilizar e comprender a realidade das mulleres
O estudo de Sarah Lamas, titulado A la caza de las tránsfugas, afonda na violencia que sofren as mulleres lésbicas no espazo público, unha problemática cotiá que recibe pouca atención tanto nas políticas públicas como no activismo. Baseándose na teoría feminista e nos estudos lésbicos/queer, a investigación de Lamas argumenta que esta violencia non pode ser comprendida unicamente como un delito de odio, xa que a categoría xeralmente ignora a dimensión de xénero. Tomando como referencia os traballos de Monique Wittig e Adrienne Rich, o estudo conclúe que a heterosexualidade opera como un sistema político de control sobre as mulleres, sendo a violencia cara ás mulleres lésbicas un castigo por desafiar esa norma. O traballo combina unha análise cualitativa de testemuños e percepcións sociais, explorando tamén as estratexias de afrontamento. Ademais deste recoñecemento, a investigación recibiu tamén o Premio Ángeles Alvariño 2024, outorgado pola Oficina de Igualdade de Xénero da UDC.
Pola súa banda, Iria María Fernández Sánchez foi premiada polo seu TFM Referentes femeninos en la historia de la música, que analiza a invisibilidade das mulleres neste ámbito. A súa investigación conclúe que a exclusión feminina na historia da música non responde a unha falta de talento, senón a unha exclusión sistemática baseada en roles de xénero. O estudo destaca como a ausencia de referentes femininos no currículo escolar perpetúa estereotipos e prexuízos, limitando a percepción das mulleres como compositoras, intérpretes ou directoras. Como resposta a esta realidade, Fernández Sánchez propón unha Unidade Didáctica para incorporar figuras femininas clave da historia da música nas aulas de 3º de ESO, fomentando tanto a igualdade de xénero como habilidades musicais esenciais.
Premios aos mellores Traballos de Fin de Grao
Na categoría de Traballos de Fin de Grao (TFG), os premios foron concedidos "ex aequo" a Xoana Abraira de Bernardo, da Universidade de Vigo, polo seu traballo O oficio de lavar: unha cartografía sensible, e a Rosalía Suárez Sánchez, da Universidade de Santiago de Compostela, pola súa investigación Os delitos contra a liberdade sexual: prevención, regulación e o piar fundamental do consentimento.