A UDC desenvolve sistemas intelixentes para mellorar a xestión dos portos galegos
A Universidade da Coruña está a liderar un proxecto de innovación que busca mellorar a xestión operativa e a seguridade nos portos da Coruña, Ferrol e Malpica mediante o uso de ferramentas baseadas en intelixencia artificial e técnicas de monitorización avanzada. A iniciativa está financiada polos programas estatais de xeración de coñecemento e desenvolverase ata 2027. Participan nela os grupos de investigación GEAMA, RNASA-IMEDIR e ISLA, xunto con especialistas en enxeñaría portuaria e informática.
O proxecto céntrase na análise continua de variables críticas como o comportamento dos buques durante as manobras, o estado dos sistemas de amarre ou as condicións meteorolóxicas e mariñas, como o vento, a néboa ou a ondada. Estes datos procesaranse con algoritmos de machine learning para anticipar posibles incidencias e axudar na toma de decisións máis eficaces en tempo real. O Porto Exterior da Coruña acolle a implementación máis avanzada, pero xa se están transferindo os resultados aos portos de Ferrol e Malpica.
Coordinado polos investigadores Enrique Peña González e Juan R. Rabuñal Dopico, o proxecto conta coa colaboración de 28 institucións e empresas internacionais, que traballan xunto ás autoridades portuarias galegas. Grazas a esta iniciativa, Galicia podería situarse como un referente na modernización dixital da xestión portuaria a nivel nacional e europeo.