A UDC amplía a súa oferta con 1.616 prazas en 78 másters oficiais para o curso 2025/2026
A Universidade da Coruña vén de presentar a súa programación de másters oficiais para o curso académico 2025/2026, que conta cun total de 1.616 prazas distribuídas en 78 titulacións. Esta oferta destaca pola súa diversidade e especialización, pensada para adaptarse ás demandas actuais do mercado laboral e do ámbito académico.
Entre as novidades máis salientables atópanse seis novos másters que incorporan ámbitos estratéxicos e innovadores como a saúde, o deporte, a sustentabilidade, a transformación dixital e a ensinanza de idiomas. Así, os novos títulos oficiais inclúen: Máster en Ciencia do Exercicio, Preparación Física e Readaptación Deportiva; Máster en Realidade Estendida; Máster en Economía Circular; Máster en Cronicidade e Novos Modelos de Atención Sociosanitaria; e Máster en Ensinanza de Español como Lingua Estranxeira ou Segunda Lingua.
Segundo explican desde a UDC, estas propostas están orientadas a cubrir necesidades específicas. Por exemplo, o Máster en Ciencia do Exercicio céntrase na preparación física de alto nivel e rehabilitación deportiva; o de Realidade Estendida aborda tecnoloxías inmersivas como a realidade virtual e aumentada; e o de Economía Circular promove a transición cara a modelos produtivos sostibles. Pola súa banda, o Máster en Atención Sociosanitaria busca formar especialistas en coidados adaptados á cronicidade, mentres que o de Español como Lingua Estranxeira prepara docentes para contextos internacionais.
Ademais, desde a Escola Politécnica de Enxeñaría de Ferrol (EPEF) destacan dúas novidades: o Máster en Tecnoloxía Téxtil e Moda Sostible, que oferta 10 prazas en modalidade virtual das 25 totais, e o Máster en Enxeñaría Naval e Oceánica, que ofrece unha mención dual que permite cursar parte da docencia nunha empresa.
Prazo de preinscrición e matrícula
O prazo ordinario de preinscrición para os másters da UDC abrirase o 26 de xuño e estará aberto ata o 14 de xullo, excepto para o estudantado con titulacións fora do Espazo Europeo de Educación Superior (EEES), que xa realizou a súa preinscrición anticipada entre febreiro e maio. As listaxes definitivas de admisión publicaranse mañá para este grupo.
A partir do 26 de xuño, poderán presentar a súa solicitude estudantes con títulos oficiais do EEES ou homologados que non tiveran feito a preinscrición no prazo anticipado.
O 23 de xullo publicarase a lista provisional de persoas admitidas, abríndose un prazo de reclamación ata o 25 de xullo. A lista definitiva sairase o 30 de xullo. O prazo para formalizar a matrícula será do 1 ao 5 de agosto, e tanto a preinscrición como a matrícula deberán realizarse en liña a través da web oficial da universidade ([www.udc.gal].
Ademais do prazo ordinario, a UDC habilitará un prazo extraordinario entre o 25 de agosto e o 7 de setembro, destinado a titulados que non formalizaran a súa preinscrición anteriormente e a aqueles que teñan pendente só o Traballo Fin de Grao e un máximo de 9 créditos ECTS. Con esta ampla e renovada oferta de másters, a Universidade da Coruña reafirma o seu compromiso cunha formación de posgrao pública, de calidade e que responde ás necesidades sociais, económicas e profesionais do presente e do futuro.