A Trova Coruñesa ofrece este sábado no Teatro Colón un concerto solidario a favor da Cociña Económica
O grupo musical A Trova Coruñesa protagonizará este sábado, 6 de decembro, un concerto solidario en apoio á Cociña Económica da Coruña. O evento terá lugar ás 19:00 horas no Teatro Colón.
A iniciativa xorde directamente do grupo, que busca “poñer a música ao servizo dunha causa social relevante na cidade”. Segundo explican os seus promotores, a idea nace do desexo de colaborar coa labor que realiza a Cociña Económica, unha entidade clave na atención a persoas en situación de vulnerabilidade.
O concerto ten como obxectivo recadar fondos para apoiar o traballo da Cociña Económica, visibilizar a súa importante labor social, fomentar a comunidade arredor da música e promover unha cultura solidaria. Ademais, ofrecerán un repertorio cálido e accesible, en sintonía coa filosofía do evento.
Para levar a cabo esta cita, A Trova Coruñesa conta coa colaboración do Concello da Coruña, que apoia na xestión, difusión e coordinación loxística; a Deputación da Coruña, que ofrece respaldo económico e institucional; e Monservices, empresa encargada do son, que colabora para que o concerto se desenvolva sen contratempos.
Quen desexen colaborar poden facelo adquirindo entradas-donativo, cuxo importe irá íntegro á Cociña Económica, ou mediante a Fila 0, para quen non poida asistir pero queira aportar, a través da conta ES43 2080 0000 7830 4008 1981, indicando no concepto “concerto solidario”.
Fundada en 1886, a Cociña Económica da Coruña conta co comedor social en activo máis antigo de España, funcionando de xeito ininterrompido e ofrecendo un apoio fundamental a quen máis o necesita.